Psa 34 | TUCO | STEP | Mbouŋ to David Muuŋ, David ineep toman Abimelek ve igham kaarom inimale ŋgar toni iwaghamgham. Tovenen Abimelek izuruni ighau ila. Mbouŋ tonene iŋarua sawa tonenen You pale napait Yoova pa poia toni irau sawa isob. Irau neneeŋag maau. Moghon moghon avog pale ipapaiti.

aMt 18:10; Mbaŋ 12:11

bHib 6:5; 1Pe 2:3

cMbo 23:1; 2Kor 9:8; Pil 4:19

eMbo 141:3; 1Pe 3:10; Yems 1:26, 3:2+

fMt 5:9; Ro 12:18, 14:19; Hib 12:14; Yems 3:17+

gLu 18:13+; 2Kor 1:3+

hRo 8:28, 35-39; 2Tim 3:11

iYo 19:36

jRo 8:1

Psalms 34

Mbouŋ to tapait Maaron toman tutuuŋ pida

Mbouŋ to David

Muuŋ, David ineep toman Abimelek ve igham kaarom inimale ŋgar toni iwaghamgham. Tovenen Abimelek izuruni ighau ila. Mbouŋ tonene iŋarua sawa tonenen

1 You pale napait Yoova pa poia toni irau sawa isob.
Irau neneeŋag maau. Moghon moghon avog pale ipapaiti.

2 You lolog poia pa Yoova, ve napaiti pa ŋgar popoia to ye igham payou.
Yes to tinumeer Yoova, ve timbadbaad pataŋani, irau tilooŋ aliŋag tonene. Leso lolodi poia paam.

3 Yam anim itiŋa talup ghiit, ve tapakur Yoova.
Itiŋa tapait iza. Pasa, ye iza tiina le tiina kat.
4 Suŋuuŋ tiou iŋarua Yoova, ve ye ilooŋ ghou.
Tauto igham mulin ghou pa mbeb tisob to namatughez padi ne.

5 Yes to tighur matadi pani pa iuul di, nene pale lolodi poia, ve tinidi iza.
Ye pale iuul di. Irau tighur matadi pani sorok ve mayadi ne maau.

6 Muuŋ, pataŋani tiina igham ghou. Tovenen nataŋ roran Yoova pa ulaaŋ.
Ve ye ilooŋ suŋuuŋ tiou, ve igham mulin ghou pa pataŋani tiou tisob.

7 Yes to timatughez pa Yoova ve titaghon ŋgar toni, aŋela toni inepneep toman di, ve iŋginŋgin di.
Ye ighamgham mulin di pa pataŋani todi. ^a
8 Yoova, ye poia kat. Taumim atoova ve aghita.
Yes to tinumeera ve tiyoŋyooŋ ila toni, poia toni izaza todi le lolodi poia kat. ^b
9 Yam tamtoghon patabuaŋa to Yoova, amatughez pani ve ataghon ŋgar toni.
Pasa, yes to tighamgham tovene, irau timbool pa mbeb eta maau. ^c

10 Laion papaghu, tapiridi tintina. Eemoghon sawa pida, adi aniiŋ maau ve pitool di.
Ve yes to tizuaria di pa Yoova, nene irau timbool pa mbeb poia eta maau.

11 Ndinatug, ^{▼▼(34:11) Yes ŋgara to Israel tiwatwaat yes to tipatoot di tighaze ‘ndinatudi.’}
anim alooŋ saveeŋ tiou tonene.

You naghaze napatooŋ gham pa ataam to amatughez pa Yoova ve ataghon ŋgar toni.

12 Vena, yom ughaze uneep pooi,
ve uneep mala izi taan toman lolom poia?

13 Ighaze tovene, ghoro uŋgin poian avom.
Saveeŋ samia, ma kaarom eta ivot ila avom malep. ^e

14 Ve upul murim pa ŋgar samia, ve ugham ŋgar poia moghon.
Uzuaria ghom pa taghoniiŋ ŋgar luuma, ve ukaal ataam pa yamŋa tamtoghon alup gham ve aneep pooi. ^f
15 Tamtoghon deŋiadi, Yoova mata padi,
ve ighurghur taliŋa pa taŋiiz todi.

16 Eemoghon ndiran samsamia, ye ighurghur koi padi.
Pale ipasob di pa taan le tisob kat. Muri pale tamtoghon matadi iŋgal di muul maau.
17 Sawa to tamtoghon deŋiadi titaŋ roran Yoova pa ulaaŋ,
ye iloŋlooŋ di, ve ighamgham mulin di pa pataŋani todi tisob.

18 Yes to pataŋani igham di le lolodi isami kat, Yoova ineep igharau di.
Tamtoghon to ighaze pataŋani itatani le tapiri isob, nene pale Yoova iuuli. ^g
19 Onoon, tamtoghon deŋiadi, pataŋani naol ivotvot padi.
Eemoghon Yoova pale igham mulin di pa pataŋani todi to naol. ^h

20 Pale iŋgin poian di kat. Irau tuadi eta ipol maau. ⁱ
21 Eemoghon yes to tizorzoor Yoova aliŋa, ŋgar todi samsamia pale imuul pa taudi, ve irab di timaat.
Yes to tighurghur koi pa tamtoghon deŋiadi, nene pale Yoova ighur atia padi, leso iyat ŋgar todi tonowen.

22 Yoova ighamgham mulin mbesooŋa toni pa pataŋani todi, leso tineep pooi.
Yes to tinumeera ve tiyoŋyooŋ ila toni, ye irau ighur atia padi maau. ^j